ក្រុមហ៊ុន Samsung
បានបញ្ចេញកុំព្យូទ័រស៊េរីថ្មីរបស់ខ្លួនមានអេក្រង់ដែលអាចបង្ហាញ
រូបភាពបានច្បាស់ល្អ ព្រមទាំងមានល្បឿនលឿនជាងមុនផងដែរ។
ATIV Book 9 Pro
គឺជាកុំព្យូទ័រមួយដែលស័ក្ដិសមទៅនឹងការប្រើប្រាស់លើការងារ
ទំហំធំដូចជា កាត់តរូបភាព ឬវីដេអូ និងការលេងហ្គេមបែប3D
ជាដើម។ សម្រាប់កុំព្យូទ័រនេះក្រុមហ៊ុន Samsung បានបំពាក់នូវ CPU
ជំនាន់ចុងក្រោយរបស់ Intel គឺ Skylake Processor Intel Core i-7
និងមានអេក្រង់ទំហំ ១៥,៦អ៊ីញ អាចបង្ហាញរូបភាពក្នុងកម្រិត 4K
ព្រមទាំងមានបំពាក់ក្រាហ្វិកប្រភេទ NVIDIA GeForce GTX 950M។
ថ្មរបស់កុំព្យូទ័រនេះមានសុពលភាពអាចប្រើប្រាស់បានរយៈពេល
៦,៥ម៉ោង
តួខ្លួនផលិតពីសារធាតុអាលុយមីញ៉ូមទាំងស្រុងដែលមានទម្ងន់ជាង២
គីឡូក្រាម។
បន្ថែមពីនេះវាក៏មានបំពាក់នូវ RAM ទំហំ៨GB,
អង្គផ្ទុកទិន្នន័យប្រភេទ SSD ល្បឿនលឿន ទំហំ២៥៦GB, រន្ធដោត USB
Type C, ឧបករណ៍បំពងសំឡេងចំនួនបួន និងមាន Wi-Fi ដែលមានល្បឿនលឿន។
កុំព្យូទ័រដែលមានសមត្ថភាពពិសេសដូចនេះត្រូវបានដាក់លក់ក្នុង
តម្លៃចាប់ពី ១ ៥៩៩ដុល្លារ។
ស្របពេលដែលបង្ហាញនូវ ATIV Book 9 Pro ក្រុមហ៊ុន Samsung
ក៏បានបង្ហាញកុំព្យូទ័រមួយប្រភេទទៀតគឺ ATIV Book 9 Spin។ សម្រាប់
ATIV Book 9 Spin នេះគឺវាមានអេក្រង់ដែលអាចដោះចេញ
និងបង្វិលបាន៣៦០ដឺក្រេ ដើម្បីអាចប្រើប្រាស់ជាកុំព្យូទ័រឬ
Tablet។ តម្លៃរបស់វាគឺថោកជាង ATIV Book 9 Pro បន្តិច គឺចាប់ពី ១
៣៩៩ដុល្លារ ដោយវាមានអេក្រង់ទំហំ១៣,៣អ៊ីញ, CPU Core i-7, RAM
ទំហំ៨GB។ តួខ្លួនរបស់វាក៏ផលិតពីសារធាតុអាលុយមីញ៉ូមដែរ
ប៉ុន្តែវាមានទម្ងន់តែ១,៣គីឡូក្រាមប៉ុណ្ណោះ។
ក្រុមហ៊ុន Samsung បានឲ្យដឹងផងថា
កុំព្យូទ័រទាំងពីរម៉ូដែលខាងលើនឹងមានដាក់លក់នៅខែក្រោយនេះ
ដោយមានលក់ផ្ដាច់មុខនៅលើវិបសាយរបស់ខ្លួន៕
