Xperia Z5 Premium ទូរស័ព្ទអេក្រង់កម្រិត4K ដំបូងគេនឹងមកដល់កម្ពុជាឆាប់ៗនេះហើយ
ទូរស័ព្ទអេក្រង់ 4K Xperia Z5 Premium
នឹងមានដាក់លក់នៅលើទីផ្សារកម្ពុជាក្នុងពេលឆាប់ៗនេះ
បន្ទាប់ពីក្រុមហ៊ុន Sony បានប្រកាសកាលពីខែកញ្ញាកន្លងទៅរួចមក។
Xperia Z5 Premium
គឺជាទូរស័ព្ទដំបូងគេបំផុតដែលមានបំពាក់នូវបច្ចេកវិទ្យាអេក្រង់
4K នៅលើអេក្រង់ទូរស័ព្ទដែលមានទំហំ៥,៥អ៊ីញ។ អេក្រង់របស់
Z5 Premium គឺអាចបង្ហាញរូបភាពបានដិតល្អជាងអេក្រង់ Full HD
បានដល់ទៅបួនដងឯណោះ។
ចំពោះដង់ស៊ីតេរបស់វាគឺខ្ពស់ល្អគឺ៨០៦ភិចហ្សែលក្នុងមួយអ៊ីញ។
ទំហំដង់ស៊ីតេនេះគឺស្មើនឹង១០ដងនៃដង់ស៊ីតេរបស់ទូរទស្សន៍ Full HD
និងស្មើនឹងពីរដងនៃស្មាតហ្វូនភាគច្រើន។
ទោះបីជាអេក្រង់របស់ទូរស័ព្ទនេះមានកម្រិត 4K ក៏ពិតមែន
ប៉ុន្តែថ្មរបស់វានៅតែអាចប្រើប្រាស់បានយូរដដែលគឺដល់ទៅ២
ថ្ងៃឯណោះ។ យ៉ាងណាក្ដីក្រុមហ៊ុន Sony
ក៏មិនភ្លេចទេនូវការបំពាក់បច្ចេកវិទ្យាជ្រាបទឹក និង
ធន់នឹងធូលីដី IP 65/68 ព្រមទាំងបច្ចេកវិទ្យាស្កេនក្រយៅដៃ
ដែលស្ថិតនៅផ្នែកខាងស្ដាំនៃទូរស័ព្ទ៕
